Martın 10-da ARDNŞ ilə Almaniyanın "RWE Dea" şirkəti arasında Xəzər dənizinin Azərbaycan sektorunda yerləşən "Naxçıvan" perspektiv strukturunun Kəşfiyyatı, İşlənməsi və Hasilatının Pay Bölgüsü haqqında sazişin əsas kommersiya prinsip və şərtlərinin razılaşdırılmasına dair Qarşılıqlı Anlaşma Memorandumunun imzalanma mərasimi keçirilib. Tədbiri giriş sözü ilə açan ARDNŞ prezidenti Rövnəq Abdullayevi bildirib ki, memoranduma əsasən "Naxçıvan" perspektiv strukturunun kəşfiyyatı, işlənməsi və Hasilatının pay bölgüsü üzrə gələcək danışıqların aparılması üçün "RWE Dea" şirkətinə müstəsna hüquq verilir. "Naxçıvan" perspektiv strukturu Xəzər dənizinin Azərbaycan sektorunda, Abşeron yarımadasından 90 km cənubda, sahildən isə 53 km aralıda, dənizin 120-750 metr dərinliklərində Azərbaycanın zəngin təbii yataqlarından olan "Bahar" və "Bulla dəniz" yataqlarının əhatəsində yerləşir: "1960-cı ildə aparılmış seysmik kəşfiyyat işləri nəticəsində aşkar edilmiş bu strukturda 1994-cü ildən axtarış qazmasına başlanılıb. "RWE" şirkəti həmin strukturla bağlı müraciət edib və tərəflər arasında danışıqlar başlanıb. Aparılan danışıqlar bu sənədin imzalanmasına zəmin yaradıb". ARDNŞ prezidenti qeyd edib ki, bu şirkət təbii qazın və xam neftin kəşfiyyatı və hasilatı sahəsində fəaliyyət göstərən nüfuzlu beynəlxalq şirkətdir. Müasir qazma və hasilat texnika və texnologiyalarına malik şirkət uzun illərdən bəri əldə etdiyi təcrübəni öz fəaliyyətində uğurla tətbiq edir. "RWE Deo" şirkəti idarə heyətinin sədri Yurgen Qrossman qeyd edib ki, imzalanmış sənəd təmsil etdiyi şirkətin Azərbaycanda fəaliyyət göstərməsi üçün giriş qapısı rolunu oynaya bilər.