Mənzildən 20 qumar aparatı götürüldü

Bakı şəhər BPİ CAİ-nin keçirdiyi əməliyyat tədbirləri nəticəsində Nərimanov rayonu F. Yusifov küçəsində qanunsuz kazino aşkar edilib. Bu barədə Bakı şəhər BPİ-dən "OLAYLAR"a verilən məlumata görə, araşdırma zamanı məlum olub ki, sözügedən ünvanda Nəsimi Bayramov adlı şəxs mənzildə gizli olaraq qumar oyunları təşkil etməklə qanunsuz sahibkarlıq fəaliyyəti ilə məşğul olurmuş. Mənzilə baxış zamanı qumar oyunu üçün nəzərdə tutulmuş 20 ədəd xüsusi aparat aşkar edilib. CAİ-nin şöbə rəisi Eldar Süleymanov bildirib ki, mənzil-kazinoda şəhər sakinləri Rövşən Əliyev, Ağdam rayon sakini Vahid Hüseynov, Tovuz rayon sakini İlmar Məmmədov və Belarus vətəndaşı Xanlar Əliyev saxlanıb. Məlum olub ki, N.Bayramovun kirayə götürdüyü mənzil 2 ay müddətində qanunsuz olaraq kazino kimi fəaliyyət göstərib. Qanunsuz sahibkarlıqla məşğul olmaq üçün bu müddətdə hüquq-mühafizə orqanlarından qorunmaq məqsədilə mənzilin giriş və çıxışları, həyəti veb-kameralarla müşahidə altında saxlanıb. Ətrafda yaşayanların diqqətini cəlb etməmək üçün qapıları yalnız daimi müştərilərin üzünə açıq olan mənzilin pəncərələri xüsusi örtüklərlə bağlı saxlanıb. İstintaq tədbirləri zamanı aşkar edilib ki, N.Bayramov qumar aparatlarına edilmiş əlavə texnika vasitələr hesabına uduş imkanlarını dəfələrlə azaltmaqla müştəriləri aldadıb. Faktla bağlı araşdırmalar davam etdirilir.