Azərbaycan diasporu, ayrı-ayrı diaspor təşkilatları və diaspor rəhbərlərindən bəhs edən yeni nəşrlər hazırlanır. Bu barədə məlumatı “OLAYLAR”İA-ya Prezident Adminstrasiyasının ictimai-siyasi şöbəsinin xaricdə yaşayan soydaşlarımızla iş bölməsinin müdiri Qafar Əliyev verib. Bildirib ki, hazırda bir neçə kitab və dərgilər üzərində iş gedir və onlardan bir neçəsi yaxın vaxtlarda oxuculara təqdim ediləcək: “Dünyanın müxtəlif ölkələrində yaşayan və fəaliyyət göstərən ən məşhur azərbaycanlılardan bəhs edən “100 azərbaycanlı” kitabı üzərində işləyirik. Kitab yaxın vaxtlarda çap ediləcək. Bundan başqa “Dünya azərbaycanlıları” adlı ensiklopedik nəşrin ikinci və üçüncü  cildləri  üzərində iş gedir. Adı çəkilən kitabda da dünyaca məşhur olan azərbaycanlılar barədə bilgilər yer alacaq”. Qafar Əliyev deyib ki, “Dünya azərbaycanlıları” adlı kitab dünya azərbaycanlılarının üçüncü qurultayına qədər hazır olacaq.