Komissarlıqların 100-dən artıq işçisi 4 aydır ki, əmək haqqı almır

Ölkənin hərbi komissarlıq sistemində çalışanlar bilərəkdən çökdürülür. "!OLAYLAR"ın məlumatına görə, artıq 4 aydır ki, respublikadakı hərbi komissarlıqlarda işçilərə maaş verilmir. Hərbi komisarlıqdakı mənbələrdən "OLAYLAR"a verilən məlumata görə, Müdafiə Nazirliyinin rəhbərliyi dekabr ayından etibarən hərbi komissarlıq sistemində çalışan işçilərə əməkhaqqı verməyi qadağan edib. Komissarlıq bu barədə bütün hərbi komissarlara xüsusi tapşırıq verib. Mənbənin dediyinə görə, bu prosesin yaranmasına səbəb hərbi komissarlıq sistemində çalışan işçilərin qəfil ixtisara düşməsinə etiraz etməsi olub. Başqa hərbi hissələrə köçürülmələri xahişi ilə hərbi komisarlıq işçiləri Müdafiə Nazirliyinə müraciət edib və onların işsiz qalmasının qarşısının alınmasını istəyib. Müdafiə Nazirliyi isə həmin qulluqçulara rədd cavabı verib. Vəzifələrini itirən 1000-dən artıq işçi də buna narazılıq olaraq hərbi komissarlıq səviyyəsində etirazlara başlayıb. Məsələ ilə bağlı müdafiə naziri Səfər Əbiyevə məlumat verilib və hərbi komissarlıq işçilərinin öz ərizəsilə işdən çıxmaq istəmədikləri bildirilib. Hərbi qulluqçularla prinsipə düşən Müdafiə Nazirliyi rəhbərliyi bütün hərbi komissarlara tapşırıq verib ki tabeçiliyində olan aşağı rütbəli işçilərin heç birinə əmək haqqı verilməsin. Nazirliyin göstərişinə əsasən artıq hərbi komissarlıqlarda hərbi komissar və onun müavinlərindən başqa heç kimə maaş verilmir. Hərbi komissar bu məsələni müdafiə büdcəsindəki pul çatışmamazlığı ilə əlaqələndirib.  Nəticədə hərbi komissarlıq sistemində çalışan 1000-dən artıq işçi 4 aydır ki maaş üzünə həsrət qalıb. Mənbənin bildirdiyinə görə artıq həmin işçilərdən 100-ə yaxını əlacsızlıqdan öz ərizələri ilə komissarlıq sistemindən çıxıb.