Elazığda 4,2 bal gücündə növbəti zəlzələ baş verib

Türkiyənin Elazığ bölgəsində baş vermiş 6 bal gücündə zəlzələnin ardınca ərazidə 4,2 bal gücündə növbəti yeraltı təkanlar qeydə alınıb. Boğaziçi Rəsədxanası və Zəlzələ Araşdırmalar İnstitutundan verilən açıqlamada yeraltı təkanların Elazığın Karakoçan vilayətinin Başyurt bölgəsində baş verdiyi bildirilib. Zəlzələnin baş verdiyi tarixdən bu günə qədər isə ərazidə 800-ə qədər kiçik yeraltı təkanlar qeydə alınıb. Bu arada xilasedicilər zəlzələdən zərər çəkənlərin axtarışlarını davam etdirir. Rəsmi məlumatlarda bildirilir ki, Elazığda baş vermiş təbii fəlakət nəticəsində 51 nəfər həlak olub. Zəlzələ nəticəsində evləri uçmuş vətəndaşlar Qızıl Ay Cəmiyyətinin qurduğu çadırlara yerləşdirilib. Paralel olaraq yaralı insanların müalicəsi üçün də Qızıl Ay tərəfindən çadırlar qurulub və xeyli sayda tibb işçisi yaralıların müalicəsinə cəlb edilib. Zəlzələ qurbanlarına cəmiyyət tərəfindən yardımlar da göstərilib. Yeraltı təkanlar daha çox Elazığın Okçular, Yuxarıdemirtaş və Başyurt kəndlərinə ciddi ziyan vurub.
Türkiyədə baş vermiş zəlzələdən dolayı dövlət başçıları prezident Abdulla Gülə başsağlığı məktubu ünvanlayıblar. Fransa prezidenti Nikolas Sarkozi, Avropa Parlamentinin sədri Jerzi Buzek, Birləşmiş Ştatların dövlət katibnin sözçüsü Filip Krovley, Kosova prezidenti Fatmir Seyidu Türkiyə prezidentinə başsağlığı məktubu göndərib.