Avropa Şurası Parlament Assambleyasının 5 nəfərdlən ibarət seçkiqabağı missiyası Azərbaycana səfər edəcək. Bu barədə məlumat verən Avropa Şurası Baş katibinin Azərbaycandakı xüsusi nümayəndəsi Veronika Kotekin sözlərinə görə, səfərdə məqsəd seçkiqabağı vəziyəti öyrənməkdir. 3 gün ölkədə qalacaq missiya üzvləri hökumət nümayəndələri və siyasi partiyalarla danışıqlar aparacaqlar. Seçkini izləyəcək qrup isə AŞPA-nın 30 üzvündən ibarət olacaq və onlar seçkidən bir neçə gün əvvəl Azərbaycana gələcəklər. Xüsusi nümayəndə bildirib ki, Avropa Şurası parlament seçkiləri ilə bağlı Azərbaycana bəzi köməkliklərini göstərir: "İndiyə qədər regionlarda icra strukturları və polislərin iştirakı ilə toplaşmaq azadlığı ilə bağlı bir sıra tədbirlər həyata keçirilib. Mərkəzi Seçki Komissiyası ilə birgə şikayətlərin qəbul olunması və onlara baxılması mövzusunda seminarlar keçirilib. Nəzərdə tutulur ki, məhkəmə orqanları və media ilə də müəyyən tədbirlər keçirilsin".