Konserv zavodunun təməlini qoydu

Artıq Azərbaycan şirkətləri qonşu dövlətlərdə iri investisiya layihələri ilə təmsil olunurlar.
Azərbaycanın iqtisadi inkişafına böyük töhfələr verən Azərsun Holdinq 2 Sentyabr tarixində Rusiya Federasiyasının iqtisadi baxımdan əlverişli bölgəsi olan Krasnodar vilayətinin Beloreçensk şəhərində inşa etdiyi Çay İstehsalı Fabrikinin açılışını etdi. Eyn zamanda inşası planlaşdırılan Konserv zavodunun da təməli qoyuldu. Tədbirə Rusiyanın tanınmış hökumət və dövlət nümayəndələri, şəhər meri və şəhər ictimaiyyətinin nümayəndələri qatılmışdı. 
Açılış mərasimində çıxış edən Azersun Holdinq idarə heyətinin sədri Abdolbari Goozal, ölkə başçısı cənab İlham Əliyevin diqqət və qayğısı nəticəsində Azərbaycan şirkətlərinin geniş imkanlar qazandığını və bu müəssisələrin də məhz Onun xeyir duası ilə inşa olunduğunu qeyd etdi. İstifadəyə verilən çay fabriki və təməli qoyulan Konserv zavodu həmçinin Azərbaycan və Rusiya dostluğunun bariz nümunəsidir. Bu tip müəssisələr əzəli dost olan Azərbaycan və Rusiya arasında münasibətlərin daha da möhkəmlənməsinə mühüm töhfədir.
Zavodun ərazisi 5 hektar ərazini əhatə edir və örtülü tikili sahə 12 000 kvadrat metrdir. Təməli qoyulan bu müəssisənin illik istehsal gücü 50 milyon banka olması planlaşdırılır. Burada tomat məhsulları, yaşıl noxud, xiyar və qarışıq turşular, konservləşdirilmiş qarğıdalı, və digər bazar tələblərinə uyğun meyvə - tərəvəz konservlərinin istehsalı nəzərdə tutulur.