Külli miqdarda narkotik vasitə aşkar edilib
 
Azərbaycan  vətəndaşı Məmmədov Ali Oruc oğlunun İranda  əldə etdiyi külli miqdarda narkotik vasitəni idarə etdiyi "Kamaz 5410/ODAZ 9370" markalı, 07-BC-165/9587-AY dövlət nömrə nişanlı-qoşqulu yük avtomobilində Astara Gömrük İdarəsində Azərbaycan Respublikasının gömrük sərhədindən gömrük nəzarətindən gizli keçirməsi barədə Gömrük Sahəsində Hüquqpozmalara qarşı Mübarizə Baş İdarəsinin Əməliyyat İdarəsinə daxil olmuş məlumata əsasən həmin avtomobil Astara rayonu Ərçivan kəndində saxlanılaraq Astara şəhərində yerləşən "Azərcənub" MMC-nin anbarına gətirilib. Avtomoşına gömrük baxışı zamanı qoşqunun arxa, alt tərəfinə bərkidilmiş qutuda üç polietilen paketin içərisində olan 32 ədəd bağlamada 48 kiloqram 810 qram narkotik vasitə-həşiş qətranı aşkar olunmuşdur.
İstintaq zamanı müəyyən edilmişdir ki, Ali Məmmədov İran İslam Respublikasının Astara şəhərində satış məqsədi ilə qanunsuz olaraq narkotik vasitələrin külli miqdarda əldə edilməsi, saxlanması, daşınması və gömrük nəzəratindən gizli Azərbaycan Respublikasının gömrük sərhədindən keçirməsi barədə özünü Fərşad kimi təqdim etmiş İran İslam Respublikasının vətəndaşı ilə qabaqcadan əlbir olub cinayət əlaqəsinə girmiş, həmin gün İran İslam Respublikasının Astara şəhərində "Payanə" adlanan ərazidə ondan üç polietilen paketdə olan 48 kiloqram 810 qram narkotik vasitə-həşiş qətranını əldə edərək cinayətin təşkilatçısı, Fərşadın təklifi ilə malların aşkar edilməsini çətinləşdirən üsullardan istifadə etməklə idarə etdiyi "Kamaz” markalı avtomobilinin yük yerindəki 12 qum kisəsindən ikisinin içərisində yerləşdirərək saxlamış, Azərbaycan Respublikasının gömrük sərhədindən gömrük nəzarətindən gizli keçirərək avtomobili Astara rayonunun Ərçivan kəndində "Yanarbulaq" adlanan ərazidə saxlayıb içərisində narkotik vasitələr olan üç ədəd paketi çıxararaq alıcıya çatdırılmasını asanlaşdırmaq üçün qoşqunun arxa, alt hissəsinə zavod şəraitindən kənar qaynaq olaraq vurulmuş dəmir qutuya qoymuş, qapısını bağlayıb qıfıllamış və narkotik vasitələri çatdırmalı olan şəxslə əlaqə saxlamaq istəyərkən Gömrük Sahəsində Hüquqpozmalara qarşı Mübarizə Baş İdarəsi Əməliyyat İdarəsinin əməkdaşları tərəfindən saxlanılmışdır.
Bu cinayəti törətdiyinə görə Məmmədov Ali Oruc oğlu Azərbaycan Respublikası Cinayət Məcəlləsinin 206.3.2, 234.4.1 və 234.4.3-cü maddələri ilə təqsirləndirlən şəxs qismində cinayət məsuliyyətinə cəlb edilmiş, barəsində Yasamal rayon Məhkəməsinin qərarı ilə həbs qəti imkan tədbiri seçilmişdir.
Hal-hazırda cinayətdə iştirak edən başqa şəxslərin müəyyən olunması istiqamətində istintaq hərəkətləri davam etdirilir.