BP şirkəti Xəzər dənizinin Azərbaycan sektorundakı özünün əməliyyatçısı olduğu Azəri-Çıraq-Günəşli (AÇG) neft yatağının işlənməsində Devon Enerji şirkətindən əlavə iştirak payının alınması işini başa çatdırıb.Lent.az-ın məlumatına görə, BP Azərbaycan şirkətinin prezidenti Rəşid Cavanşir bunu tərəflər arasında geniş və əhatəli sövdələşmə haqqında 2010-cu ilin mart ayında edilmiş elandan sonra atılan mühüm addım kimi dəyərləndirib. Onun sözlərinə görə, indi həmin sövdələşmə paketinin Azərbaycanla bağlı komponenti başa çatır. Azərbaycanda bu əlavə iştirak payının alınması BP üçün mühüm bir strateji ərazi olan Xəzər regionu ilə bağlı şirkətin uzunmüddətli öhdəliyinin bir hissəsidir.
“BP bu regionda artıq güclü bir mövqe tutur və onu gələcəkdə daha da gücləndirmək niyyətindədir. Bu niyyətin digər bir əhəmiyyətli nümunəsi bu yaxınlarda ARDNŞ ilə Bakıda imzaladığımız Sazişin Əsas Prinsipləri sənədidir. Bu sənəd Xəzər dənizində “Şəfəq-Asiman” blokunun birgə kəşfiyyatı və işlənməsi üçün yeni bir hasilatın pay bölgüsü sazişinin əsas kommersiya prinsiplərini müəyyən edir” – deyə, Rəşid Cavanşir qeyd edib.