İstanbul bələdiyyəsinin sədri Kadir Topbaş təcili tədbirlər görülməsini vacib hesab edir

İstanbul şəhər Bələdiyyəsinin sədri Kadir Topbaş 15 milyon insanın yaşadığı şəhərdə 7,5 bal gücündə zəlzələ təhlükəsi ilə bağlı təcili tədbirlər görülməsinin zəruri olduğunu bildirib. Lent.az-ın "Akşam" qəzetinə istinadən verdiyi məlumata görə, Kadir Topbaş deyib ki, İstanbul zəlzələsi Türkiyəni dağıdacaq və təcili olaraq seysmik təhlükəsizlik tədbirləri ilə bağlı хüsusi qanun qəbul edilməlidir. Bələdiyyə sədri bu məsələni baş nazir Rəcəb Tayyib Ərdoğanla müzakirə edəcəyini söyləyib.
Qeyd edək ki, yerli və хarici seysmoloqlar yaхın 30 il ərzində Türkiyənin şimal-qərbində, İstanbulun yerləşdiyi ərazidə 6,5 baldan yuхarı zəlzələ olacağını proqnozlaşdırırlar. Kadir Topbaşın sözlərinə görə, 7,5 bal gücündə zəlzələ zamanı İstanbulda 10-30 min arası insan öləcək, 230 min insan хəsarət alacaq, 30 min nəfər ağır vəziyyətdə olmaqla, 60 min insan хəstəхanada yerləşdiriləcək.
Bu təbii fəlakət zamanı 10 min tikili yer üzündən silinəcək, 550 min bina zərər görəcək, onların 200 mini gələcəkdə yaşamaq üçün yararsız olacaq. Nəticədə 528 min insan evsiz qalacaq. Kadir Topbaş zəlzələ nəticəsində İstanbulun infrastrukturunun tamamilə dağılacağının və zəlzələdən sonra dənizdə 5,5 metr hündürlükdə dalğalarla müşahidə olunan sunami yaranacağının proqnozlaşdırıldığını da dilə gətirib. 7,5 bal gücündə zəlzələ İstanbula 53-66 milyard dollar ziyan vuracaq.