İlqar İbrahimoğlu: "Məhkəmə hökmü olmadan qanuna ziddir"

XXl əsrdə demokratik quruluşa malik olan bir ölkədə dini kitabların satışına qadağa qoyulması əhali tərəfindən birmənalı qarşılanmır. Mütəxəssislərin fikrincə, qadağanın olması artıq senzuradan xəbər verir. Dini Etiqad və Vicdan Azadlıqlarını Müdafiə Mərkəzinin rəhbəri İlqar İbrahimoğlu bizimlə söhbətində problemlə bağlı təəssüf doğuran məqamları dilə gətirdi. Onun sözlərinə görə, Sovet İttifaqı dağıldıqdan sonra senzura məsələsi ortadan qaldırılsa da, hal-hazırda dini ədəbiyyatla bağlı sözün həqiqi mənasında senzura qalmaqdadır: "Heç bir məhkəmə hökmü olmadan Dini Qurumlarla İş üzrə Dövlət Komitəsində olan bir qrup ekspert tərəfindən kitabların yararlı olması və ya olmaması ilə bağlı rəy verilir. Bu da əslində sovet dövründə olan həmin senzuradır. Dünyada belə bir təcrübə yoxdur. Hər hansı bir dövlətçiliyə zərərli olan, radikallığı yayan ədəbiyyat haqqında yalnız məhkəmə yolu ilə rəy verilə və o yasaq oluna bilər". İ.İbrahimoğlu hesab edir ki, bu gün ölkədə dini ədəbiyyatla bağlı baş verənlər həm ölkənin qanunvericiliyinə ziddir, həm də insan haqları və azadlıqlarının pozulmasıdır. ("OLAYLAR"İA)