Vahid Məhərrəmov: "Hökümət bu sahədə çevik siyasət aparmalıdır"

Dövlət Taxıl Fondu taxılın tədarükünün müddətini oktyabr ayının 1-nə qədər uzadıb. İyul ayında başlanan prosesin vaxtının uzadılmasına münasibət bildirən ekspertlər bildirir ki, bu fondun taxıl tədarükü üçün fermerlərdən ucuz qiymət, yüksək keyfiyyət tələb etməsindən irəli gəlir. Belə ki, fond taxıl tədarükü ilə bağlı iyul ayından başlasa da məlumatlara görə, fermerlər fona taxıl satmayıb. Belə olan təqdirdə fondun taxıl tədarükünün hansı şərtlər altında mümkün olacağı qaranlıq qalır. Məsələyə münasibət bildirən kənd təsərrüfatı üzrə ekspert Vahid Məhərrəmov bildirib ki, ümumilikdə ölkədə fondun tələbatına uyğun olan məhsuldarlıq yox səviyyəsindədir. Ekspert qeyd edib ki, məhsurdarlıqla bağlı fondun təklif etdiyi qiymətin real bazar qiymətlərindən aşağı səviyyədə olması fondun taxıl tədarükündə müəyyən problemlər olacağından xəbər verir: "Bu gün real bazarda taxılın qiyməti 30 qəpiyi üstələməsinə baxmayaraq DTF fermerlərdən taxılı 16-18 qəpiyə almaq istəyir. Aydın məsələdir ki, fermerlər real bazar qiymətini qoyub. Fondun elan etdiyi qiymətə taxıl satmaq arzusunda olmayacaq. Bu yöndə humanist addım atmayacaq. Bu fermer üçün çıxış yolu deyil". V.Məhərrəmov hökümətin bu sahədə çevik siyasət aparmalı olduğunu vurğulayıb. Qeyd edib ki, bu yöndə ədalətli qiymət formalaşdırılmalıdır. V.Məhərrəmov fondun təklif etdiyi qiymətlə Qazaxıstandan 4-cü sort buğda almağın mümkünsüzlüyünü deyib: "DTF-nun təklif etdiyi qiymətlərlə heç Qazaxıstandan 4-cü sort buğda belə almaq olmaz. Çünki, hazırda Qazaxıstan 4-cü sinif buğdanı 220 dollara təklif edir. Bura yol və digər izafi xərcləri əlavə edəndə qiymət 240 manata çıxır".