Dubaydan Azərbaycana qaçaqmalçılıqla külli miqdarda brilliyant qaşlar gətirən şəxs yaxalanıb. Bu barədə “OLAYLAR”a Dövlət Gömrük Komitəsindən veriblər. Məlumata görə, Milli Təhlükəsizlik Nazirliyindən daxil olmuş əməliyyat məlumatı əsasında Dubay-Bakı aviareysi ilə Birləşmiş Ərəb Əmirliklərindən Azərbaycana gələn Mehrəliyev Rəşad Atamoğlan oğlu gömrük nəzarətindən keçib Heydər Əliyev Beynəlxaq Hava Limanının ərazisindəki avtomobil dayanacağında «Mercedes Benz» markalı 10 NM 240 dövlət nömrə nişanlı avtomobilə minərkən saxlanılıb və şəxsi yoxlama zamanı hər iki ayağının pəncəsinin altına yapışdırılmış iki ədəd şəffaf sellofandə külli miqdarda, 50771 manat dəyərində, ümumi xalis çəkisi 64,416 qram (322,54 karat) olan brilyant qaşlar aşkar edilərək götürülüb. Dövlət Gömrük Komitəsi İstintaq İdarəsi tərəfindən Azərbaycan Respublikası Cinayət Məcəlləsinin 206.1-ci maddəsilə cinayət işi başlanıb.
Aparılan istintaqla müəyyən edilib ki, Mehrəliyev Rəşad Atamoğlan oğlu brilyant qaşlar almaq məqsədilə Dubay-Bakı aviareysindən istifadə edərək Birləşmiş Ərəb Əmirliklərinin Dubay şəhərinə gedib, Dubaydakı ticarət mərkəzlərinin birindən külli miqdarda, 50771 manat dəyərində ümumi xalis çəkisi 64,416 qram (322,54 karat) olan brilyant qaşlar əldə edərək həmin brilyant qaşları qaldığı oteldə malların aşkar edilməsini çətinləşdirən üsullardan istifadə etməklə sellofan paketlərə yerləşdirib yapışqanla hər iki ayağının pəncə hissəsinin altına yapışdırmış və Dubay-Bakı aviareysi ilə Heydər Əliyev Beynəlxaq Hava Limanına gətirib, Hava Nəqliyyatında Baş Gömrük İdarəsinin ikinci sərnişin şöbəsində qaçaqmalçılıq yolu ilə, gömrük nəzarətindən gizli Azərbaycanın gömrük sərhədindən keçirib. Hava limanını tərk etdikdən sonra avtomobil dayanacağında «Mercedes Benz» markalı 10 NM 240 dövlət nömrə nişanlı avtomobilə minmək istəyərkən Rəşad Mehrəliyev Gömrük və Milli Təhlükəsizlik Nazirliyinin əməkdaşları tərəfindən saxlanılmış və üzərində aparılmış şəxsi yoxlama zamanı hər iki ayağının pəncəsinin altına yapışdırılmış iki ədəd şəffaf sellofanda brilyant qaşlar aşkar edilərək götürülüb.
Mehrəliyev Rəşad Atamoğlan oğlu təqsirləndirilən şəxs qismində məsuliyyətə cəlb olunub və ona Cinayət Məcəlləsinin  206.1-ci maddəsilə ona ittiham elan edilib.