Sumqayıta 12 yanğınsöndürən maşın və 200 nəfərlik canlı qüvvə cəlb olunub

Bu gün Dövlət Neft Şirkətinin “Azərikimya” istehsalat birliyinin Etilen-polietilen zavodunda Fövqəladə Hallar Nazirliyinin qüvvələri ilə birlikdə mülki müdafiə təlimləri keçirilib. Təlim fövqəladə hadisələr zamanı müvafiq qurumların qarşılıqlı, səmərəli və operativ fəaliyyətinin təşkil olunması, fövqəladə hadisələr baş vermə ehtimalı yüksək olan zavodda mülki müdafiə hazırlığının real vəziyyətini öyrənmək, mümkün ola biləcək hər hansı qəza zamanı əhalinin və işçilərin mühafizəsinin səviyyəsini yoxlamaq məqsədi daşıyıb.

Təlim ssenarisinə uyğun olaraq, zavodun sexində kimyəvi məhsulun sızması nəticəsində iri həcmli çənlərdən birində baş verən partlayışdan sonra Mülki Müdafiə qüvvələri hadisə yerində, dağıntı olan sexdə və dəmir yolu estakadasında xilasetmə və qəzanın qarşısının alınması işlərini icra ediblər.

FHN-nin Dövlət Yanğından Mühafizə Xidmətinin rəisi, general-mayor Füzuli Əsədov bildirib ki, təlimə nazirliyin Bakı və Sumqayıt qarnizonlarının şəxsi heyəti də daxil olmaqla 200 nəfərlik qüvvə, 12 yanğınsöndürən maşın və digər xüsusi texnika cəlb olunub.