Gəncənin 2504 illiyi ilə əlaqədar şəhərdə hazırlıq işləri başlanıb. Sentyabrın 22-23-nə planlaşdırılan ikigünlük bayram şənliklərinə əhalini küçə və meydanlarda xüsusi carçılar səsləyəcək. Dahi Azərbaycan şairi Nizami Gəncəvinin məqbərəsi önündə Gəncə Dövlət Dram Teatrı aktyorlarının ifasında şair Məmməd Alimin əsəri əsasında hazırlanmış "Gül və zəhər" tamaşası nümayiş olunacaq. Proqramda görkəmli yazıçı Mir Cəlal Paşayevin muzeyində Gəncə Dövlət Kamera Orkestrinin çıxışı da var. Bayram tədbiri Gəncənin mərkəzi meydanında keçiriləcək böyük el şənliyi və konsert proqramı ilə başa çatacaq.