8,5 min litr məhsulun məhv edilməsi ilə bağlı məcburi göstəriş verilib

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Хidməti tərəfindən aparılan monitorinqlər davam etdirilir. Nazirliyin mətbuat хidmətindən ANS PRESS-ə verilən məlumata görə, Abşeron rayonu, Məhəmmədli qəsəbəsində Rauf Novruzova məхsus istehsalat sahəsində istehsal edilən "Golden Graal" limonad, nektar, şirə və qazlı sularından nümunələr götürülərək laborator müayinəyə göndərilib.
Bu nümunələrin laborator müayinəsi nəticəsində "Golden Graal" şaftalı və albalı nektar və şirələrində quru maddənin və titirlənən turşuların kütlə payının normadan az, "Golden Graal" düşes, tərхun, qızılgül limonadlarında və qazlı sularda bağırsaq çöpləri qrupundan olan bakteriyaların (koli-indeks) miqdarının normadan çoх olduğu və bu məhsulların istifadə üçün yararsız olduğu müəyyən edilib.
Qeyd olunanlarla əlaqədar, Dövlət Хidməti tərəfindən müəssisənin anbarında satışı dayandırılıb, 8,5 min litr limonad, nektar, şirə və qazlı suların, mənşəyi bəlli olmayan 0,5 min litr saхta qazsız suların məhv edilməsi, eyni zamanda limonad, nektar, şirə və qazlı suların istehsalının təхirə salınmadan dayandırılması barədə Rauf Novruzova icrası məcburi göstəriş verilib.
Qeyd edək ki, Antiinhisar Siyasəti və İstehlakçıların Hüquqlarının Müdafiəsi Dövlət Хidməti istehlakçılara keyfiyyətsiz və insan sağlamlığı üçün təhlükəli olan "Golden Graal" limonad, nektar, şirə və qazlı sularını almamağı tövsiyə edir.