Sabiq futbolçu bundan sonra fiqurlu konkisürmə ilə məşğul olacaq

Türkiyə yığma komandası və “Beşiktaş” futbol klubunun sabiq futbolçusu İlhan Mansız indi də fiqurlu konkisürmə ilə məşğul olmaq qərarına gəlib. 35 yaşlı Mansız məşq edərək Türkiyəni Soçidə keçiriləcək Qış Olimpiya Oyunlarında təmsil etməyi düşünür. İlhan Mansız artıq öz tərəfdaşı Olqa Bestandiqova ilə məşqlərə başlayıb. “Yaxın iki ildə fiqurlu konkisürmə üzrə Türkiyə çempionatında qalib gəlmək istəyirəm. Sonradan Soçi Olimpiadasında iştirak edəcəm. Ümid edirəm ki, uğur mənim üzümə güləcək”, - deyə Türkiyə yığmasının sabiq futbolçusu bildirib.

Xatırladaq ki, İlhan Mansız 2002-ci ildə Türkiyə yığmasının heyətində Dünya çempionatında bürünc medal qazanmışdı.