Gələn il parlamentdə bu düşərgədən yeni isimlər görəcəyik

Noyabr ayında Milli Məclisə seçkilər keçiriləcək. Parlamentə seçkilər 125 dairə üzrə majoritar qaydada həyata keçiriləcək. Hazırda parlamentdə təmsil olunan deputatların bir qismi bu il mandat almayacaqlar. Müxalifət də gələn il Milli Məclisdə başqa deputatlarla təmsil olunacaq. Məlumatlı mənbənin "OLAYLAR"a verdiyi məlumata görə, seçicilərin etimadını doğrultmadıqları üçün 8 saylı Binəqədi seçki dairəsindən deputat seçilmiş Müsavat başqanının müavini Arzu Səmədbəyli, 18 saylı Nərimanov-Nizami seçki dairəsindən seçilmiş AXCP sədrinin keçmiş müavini Cəmil Həsənli, 26 saylı Sabunçu birinci dairəsindən seçilmiş Böyük Quruluş Partiyasının sədri Fazil Mustafa, 34 saylı Xətai ikinci dairəsindən seçilmiş Nəsib Nəsibli, 41 saylı Sumqayıt birinci dairəsindən seçilmiş İkram İsrafil (Müsavat), 52 saylı Quba dairəsindən seçilmiş Vahid Əhmədov, 95 saylı Tərtər dairəsindən seçilmiş Aynur Quliyeva bu çağırış deputat ola bilməyəcəklər. Öz davranışları ilə Milli Məclis rəhbərliyinin əsəbləri ilə oynamış 63 saylı Sabirabad seçki dairəsindən deputat olmuş Pənah Hüseynin deputat olmayacağı daha dəqiqdir. Deputat seçilə bilməyən müxalifətçilərin yerlərini başqa müxalifətçilər tutacaq. Mənbə bildirir ki, Qabil Hüseynli, Qubad İbadoğlu, Sülhəddin Əkbər (Müsavat), Razi Nurullayev, Asif Kərimov (AXCP, Əvəz Temirxan (ALP) və Əli Əliyevin (AVİP) deputat seçilmək ehtimalları var. ("OLAYLAR" İA)