Azərbaycanın sel basmış bölgələrində seçkilərin keçirilməsi ilə bağlı heç bir narahatlıq yoxdur.
Bu barədə Trend-ə Mərkəzi Seçki Komissiyasının (MSK) mətbuat katibi Azər Sarıyev bildirib: “Seçki məntəqələrinin bina ilə təmin olunması işində bizə yerli icra hakimiyyəti orqanları kömək edir. Bütün məntəqələrimiz normal şəraiti olan binalarla təmin olunub”.MSK nümayəndəsi bildirib ki, dairələrlə mütəmadi olaraq əlaqə saxlanılır və narahatlıq doğuran hər hansı bir informasiya daxil olmayıb.Xatırladaq ki, bu ilin iyununda Kür çayının məcradan çıxması və digər çaylarda daşqınlar səbəbindən Azərbaycanın 40 rayonunun ərazisində subasma halları qeydə alınıb. Bu təbii fəlakət nəticəsində 20 minə yaxın ev su altında qalıb, 300-dən çox ev dağılıb, 2 min ev qəzalı vəziyyətə düşüb, 76 min hektar əkin və örüş sahələrini su basıb.