Son illərdə Azərbaycanda kibercinayətkarlıq hallarının artma tendensiyası müşahidə olunur. Bunu deyən Milli Təhlükəsizlik Nazirliyinin təmsilçisi Kərəm Kərəmovun sözlərinə görə, bu cinayətlər əsasən çirkli pulların yuyulması, kredit kartlarından oğurluq, transmilli cinayətkar qrupların bir neçə ölkə ərazisində bir-birlərini tanımadan birgə fəaliyyətləri ilə bağlıdır. Nəzarətdən kənar, qanunsuz rabitə kanallarının təşkil edilməsi, kompüter şəbəkələri vasitəsilə informasiyaların məhvi, təcrid olunması, dezinformasiyaların verilməsi, ideoloji təbliğat aparılması, pozuculuq mahiyyətli məlumatların verilməsi, bank-maliyyə fırıldaqları, terror barədə bilə-bilə yalan məlumatların verilməsi halları hələ də davam edir: "Azərbaycan ərazisi işğala məruz qalıb, ölkədə 1 milyona qaçqın və məcburi köçkün var. Onlar arasında vətənpərvər ruhlu gənclər var. Öz etirazlarını bildirən həmin şəxslərlə bağlı 1998-2000-ci illərdə bir neçə insident baş verib. Araşdırmalar göstərir ki, bu insidentin yaranma səbəbi qonşu dövlətin nümayəndələri tərəfindən Azərbaycanın milli forumları və çatlarında qızışdırıcı münasibətlər yaratmaqla həmin şəxsləri bu insientə sövq etmələridir".