"Starşina Elxan" məhbusları döyməkdən şikəst edib

Bakıda yeni istifadəyə verilən Bakı İstintaq Təcridxanasında saxlanılan şəxslərə amansız işgəncələr olur. Bu barədə "OLAYLAR"a təcridxanada saxlanılan məhbuslar məktub göndərib. Məktubda bildirilir ki, təcridxanada təqsirləndirilən şəxs qismində saxlanılan şəxslərlə amansız davranırlar: "Bakı İstintaq Təcridxanasında saxlanılan şəxslərə qarşı xüsusi işgəncələr verilir. Saxlanılan şəxslər rezin kameralara salınır, onlara qarşı amansız münasibət bəsləyirlər. Nəzarətçilər burada saxlanılan şəxslərə heyvani münasibət bəsləyirlər. Narazılıq edənlərə qarşı isə daha amansız olurlar. Təqsirləndirilən şəxsləri "cərimə kameraları" kimi tanınan rezin kameralarda paltarsız saxlayırlar. Təqsirləndirilən şəxsləri heç bir əsas olmadan döyür, incidir, onlara xəsarət yetirirlər". Məktubda həmçinin konkret faktlar da göstərilib. Müraciətdə bildirilir ki, bir müddət əvvəl bir təqsirləndirilən şəxs xüsusi amansızlıqla döyülərək şikəst edilib: "Məsələn, təcridxanaya martın 1-də Lənkərandan Aslan Zeynalov adlı təqsirləndirilən şəxs gətirilib. Həmin məhbus təcridxanaya gətirilən kimi nəzarətçilər tərəfindən döyülməyə başladı. Təqsirləndirildən şəxs kameraya gətirilən kimi döyüldü. Təcridxananın nəzarətçisi "Starşina Elxan" kimi tanınan Elxan Əzizov Aslan Zeynalovu rezin kamerada 4 gün ac saxladı. Daha sonra onu Elxan Əzizov bir gün axşama qədər döydü. Nəticədə təqsirləndirilən şəxsin ayaqları sındı. Ondan sonra isə Elxan Əzizov təqsirləndirilən şəxsin guya yıxılaraq xəsarət aldığını deyib və həkimlər də təqsirləndirilən şəxsi bu adla müalicə ediblər. Hörmətli media nümayəndələri, xahiş edirik, təcridxanadakı bu özbaşınalığın ictimailəşdirilməsində bizə yardım edəsiniz".
Müraciət sahibləri bildirirlər ki, təcridxanada baş verən bu qanunsuzluqdan müəssisə rəhbəri xəbərsizdir. Bu barədə məlumatlar nəzarətçilər tərəfindən gizlədilir və təcridxana rəhbərinin məlumatlandırılmasına mane olurlar: "Təcridxananın rəhbəri Elxan Sadıqov bu məsələdən xəbərsizdir. Ona bu barədə məlumat verməyə imkan vermirlər. Saxlanılan şəxslərə hədə-qorxu gəlinir ki, bu işgəncələr barədə rəisə məlumat verilməsin. Təqsirləndirilən şəxslər də qorxusundan rəisə bu barədə məlumat vermirlər".