Həbsdə olan baş redaktor məhkəmə protokolları ilə tam tanış olacaq

Bakı Apellyasiya Məhkəməsində  hakim Mirpaşa Hüseynovun sədrliyi ilə həbsdə olan jurnalist, "Gündəlik Azərbaycan" qəzetinin baş redaktoru Eynulla Fətullayevin apellyasiya şikayətinə baxılıb. "OLAYLAR"ın məlumatına görə, prosesdə çıxış edən təqsirləndirilən şəxs Eynulla Fətullayev bildirib ki, onun barəsində olan cinayət işilə bağlı Qaradağ rayon məhkəməsində 16 proses keçirilsə də, cəmi 10 məhkəmə protokolu ilə tanış olub. Təqsirləndirilən şəxs digər protokollarla da tanış olmaq istədiyini bildirib. Məhkəmə E. Fətullayevin vəsadətini təmin edib və onun protokolla tanış olması üçün 5 gün vaxt verib. Proses sentyabrın 7-dək təxirə salınıb.
Qeyd edək ki, Eynulla Fətullayev "Qarabağ gündəliyi" adlı yazısında Xocalı sakinlərini təhqir etdiyi üçün həbs edilib. Həbsindən sonra ona qarşı əlavə ittihamlar da irəli sürülüb və o ümumilikdə 11 il müddətinə azadlıqdan məhrum edilib. 2 il sonra isə saxlandlığı cəzaçəkmə müəssisəsində onun üzərindən narkotik maddə aşkar edilib. Bu il isə Qaradağ rayon məhkəməsi Eynulla Fətullayevi daha 2 il 6 ay azadlıqdan məhrum edib. Jurnalist məhkəmə qərarından apellyasiya şikayəti verib.