Milli Azadlıq Hərəkatının lideri Əbülfəz Elçibəyin ölümündən 10 il ötür

Avqustun 22-si Azərbaycanın sabiq prezidenti, Milli Azadlıq Hərəkatının mərhum lideri Əbülfəz Elçibəyin vəfatı günüdür. Düz on il öncə isti yay günlərində bütün Azərbaycanın, türk dünyasının gözü Ankaraya-Gülhanə Hərbi Tibb Akademiyasına dikilmişdi. Ağır xəstəlikdən əziyyət çəkən böyük öndər ölüm yatağında idi. Yaxın ətrafının bildiyi həqiqət tezliklə üzə çıxdı. Bəlli oldu ki, Bəyin xəstəliyi ağırdır və ömrünü türk dünyasının birliyi və bütövlüyünə, Azərbaycanın istiqlal qazanmasına həsr etmiş böyük insan çox yaşamayacaq. Qara xəbər Azərbaycana avqustun 22-si çatdı. Minlərlə insan Milli Elmlər Akademiyasının həyətinə, aeroport yoluna çıxdı. Böyük Bəyi qarşılamağa çıxanların, onun ölümünə için-için ağlayanların çoxu onu şəxsən tanımırdı, Bəyin o insanlara yaxşılığı keçməmişdi. Sadəcə olaraq hamı onu gözəl insan, sözünə düz kişi, yalanı sevməyən, riyakarlara nifrət edən, xalqına yalan danışmağı xoşlamayan siyasətçi kimi tanıyırdı. Elçibəy 62 illik ömründə xalqdan aralı olmadı. Daim xalqla düşündü, xalqın istəkləri ilə yaşadı. Elçibəy 4 iyun Gəncə qiyamı zamanı qiyamçılarla, mülayimliyindən sui-istifadə edib onu ələ salan, barəsində lətifələr qoşanlarla sərt davranmadığına görə onu qınayanlara "bu xalqı imperiya onsuz da çox əzib, bizdəmi əzəkğ" deyə cavab verərdi. Elçibəyi xalqa sevdirən bu sadəliyi, yüksək humanizmi, sözünə bütövlüyü idi.
 Elçibəy həyatda bir kişi kimi də, siyasətdə lider kimi də sözünə bütöv, verdiyi vədlərə əməl edən saleh bir insan idi.
1992-ci il Prezident seçkiləri ərəfəsində xalqa bir sıra vədlər verdi. O zaman köhnə kommunistlər, partnomenklaturanı təmsil edən məmurlar ali məktəbləri bazara çevirmişdilər. Elçibəy vəd verdi: ali məktəblərdə, qəbul və semestr imtahanlarında rüşvət yığışdırılacaq. Dedi də, etdi də. Qəbul imtahanlarında test üsulu tətbiq edildi. Rüşvətxor kommunistlərin əyri əlləri kəsildi. Elçibəy xalqa Qarabağ vədini verdi. Bir neçə ay keçirilən hərbi əməliyyatlar nəticəsində Dağlıq Qarabağ ərazisinin böyük bir hissəsi erməni işğalçılarından azad edildi. Elçibəy Azərbaycana tam müstəqillik vəd etdi. Yerinə yetirdi. MDB ölkələrində ilk dəfə olaraq Azərbaycandan rus qoşunları çıxarıldı. Amma rus imperializmi Elçibəyin bu arzusunu həyata keçirməyə imkan vermədi. Tezliklə ikibaşlı qartal timsallı şər imperiyası Azərbaycandakı nökərlərinin əlinə silah verərək Elçibəy hakimiyyətinin üstünə qaldırdı. Komandası da özü kimi əməli saleh, xalqa açıq, vicdanlı olsaydı, bəlkə də hakimiyyəti qoruyub saxlamaq olardı. Hakimiyyət əldən verildi. Amma Elçibəy şimal və cənubdakı imperiyaların planını pozaraq dövləti qoruyub saxladı. Qiyamla devrilsə də, hakimiyyəti Heydər Əliyevə verə bildi. Böyük dövlətlərin gözlədiyinin əksinə olaraq Azərbaycan dövləti 1993-cü ildə yıxılmadı. Təcrübəli dövlət xadimi Azərbaycanı tam müstəqil, güclü dövlətə çevirərək xalqın da, Elçibəyin də arzusunu reallaşdırdı.
 Əbülfəz Elçibəyi səriştəsizlikdə, dövlət başçısına uyğun olmayan bəyanatlar verməkdə, qeyri-standart davranışlarda suçlandırırlar. Düzdü, dövlətin zirvəsində hərəkat liderinə xas bəyanatlar verilirdi. Böyük dövlətlərin imperiya ambisiyaları üzünə vurulurdu. Amma Elçibəy bunları şəxsi sərvətini artırmaq naminə, tarixdə qalmaq üçün, populyarlaşmaq xatirinə etmirdi. Xalqının, dövlətinin, böyük türk millətinin maraqları naminə, istəklərinə uyğun edirdi. Daxildə böyük rüşvətxor ordusu ilə də xalqı əziyyət çəkməsin deyə üz-üzə gəlirdi. Elə buna görə də köhnə partnomenklatura tör-töküntülərinin, liderlik etdiyi düşərgə daxilindəki satqınların, simasızların apardığı qara piara rəğmən Elçibəyə ümumxalq məhəbbəti var. Azərbaycan gücləndikcə, qüdrətləndikcə bu məhəbbət daha da artacaq.

Aydın